جـــــــرح الريــــــــــــــد

سافر ياجرح جواي سافر فوق جناح السرعة
الموج يوم يضارب الشاطئ والريح لما تطفي الشمعة
المحبوب وقت يجرحنا لو في ضمير يحس أو يوعة
جرح الريدة كان يتعدى من ضمن العجايب السبعة

***


الضايق عقارب الريدة يرميهو الاثر بالخلعة
بنوت حوة ما لاقني بالشوق والشجن واللوعة
بالليل والجراح نتاحة والناس نامو بعد الهجعة
شفت بنات نعش في دمعي يتهاذن بهي الطلعة

***


يا قلبي الحزين أسمعني خت قرض الصبر في الوجعة
قلي كيف تفيدك عترة وانت وقعت كمين وقعة
واشهدت واستغفرت غسلت العليك بي دمعة
واتيقنت قت بلاك مالي تب عشم في رجعة

***


مالك قلبي من تطراها بالبيك لابتحس لابتوعة
منحوس انت مما قمت أصلك ما بتفوز بي قرعة
سعدك لو تجيبو كرامة كان مديت زمان القرعة
في المر ماعليك ملامة أشرب ماتفضل جرعة

***


الناس قالولي انساها لو داير تطيب بي سرعة
حاولت وغلبني أنساها ذكرت ليا صبحت طبعة
طلعة في صباح أيامي ماغابت خميس لا جمعة
سرقت بالي ما فضلو منو قدر أعد لا سبعة

***


يا ست الحسان أحلامنا مابنلقاها عند ست ودعة
في دنيا الغرام والريدة البكا والنواح مابدعة
زول كانت مشاعرو عليكي جاري زي الحجر في الفلعة
محتار نارو كيف يطفيها مادام النفس بقا ولعة